Non contamineis o noso Camiño!

Por que é importante?

A reapertura da mina supón un grave impacto e risco para o Camiño Francés do Camiño de Santiago e outros elementos do patrimonio cultural, material e inmaterial, dos concellos afectados, segundo recolle un informe do ICOMOS - COMITÉ NACIONAL ESPAÑOL CONSELLO INTERNACIONAL DE MONUMENTOS E LUGARES -[1] causando importante preocupación, rexeitamento e alarma social.

Esta mina estaría a escasos metros do espazo protexido do Camiño Francés ao seu paso por Pedrouzo, o que se traduciría na perda dos valores tanxibles e inmateriais que fan desta última etapa, antes de entrar en Santiago de Compostela, un tramo singular.

O tráfico intenso xerado por camións, o movemento continuo nas proximidades ao longo do Camiño, a contaminación lumínica e a presenza de po e outros compoñentes volátiles no aire son outros moitos problemas que tamén poden afectar gravemente ás calidades ambientais dun espazo cultural que é a principal carta de presentación de Galicia para viaxeiros de todo o mundo.

Todo isto vai en contra da preservación da autenticidade e integridade física deste sitio Patrimonio da Humanidade que engloba un amplo contexto cultural, ambiental e paisaxístico. Hai que protexer os excepcionais valores universais que motivaron a súa inclusión pola UNESCO na súa Lista do Patrimonio Mundial.

Entre 1974 e 1986 esta mesma zona experimentou o que é ter unha mina. En apenas doce anos deixou media ducia de ríos contaminados permanentemente pola drenaxe ácida das minas, moitas terras agrícolas quedaron totalmente arrasadas e transformáronse en grandes ocos mineiros sen ningún tipo de restauración ambiental. Nestas terras nunca se puideron retomar as actividades agrícolas e numerosos mananciais, pozos e fontes de auga foron destruídos, inutilizados ou contaminados a perpetuidade.

Ademais de todo o anterior, este proxecto podería provocar graves danos na conca hidrográfica do río Ulla ata a sua desembocadura na Ría de Arousa pola contaminación con metais pesados. Son razóns fortes para impedir que este proxecto siga adiante.

Se tamén queres preservar a beleza xenuína destas terras, asina hoxe e axúdanos a parar esta atrocidade.

Referencias: